澳門賀新歲：全球熊貓大拜年　開開心心無交嗌

澳門賀新歲：
全球熊貓大拜年　開開心心無交嗌

兔Su：「Hi！等咗12年終於又到我出場啦！今日赤口，阿媽話個個燥底忌拜年，成家人過大海睇熊貓喎！你哋班熊貓今年就威啦！開館唔夠兩星期就變澳門人氣新星，仲話要限人流入場，成都又話整個《全球熊貓大拜年》咁誇張，仲紅過我！我要去熊貓館踢館，話佢知今年我至係主角！」

記者：陳慧敏
攝影：林栢鈞
模特兒：Sansu@Inspire

10:00am
吸收巨星鑽石能量

兔Su：「話明踢館同行大運，一定要做足準備！聽聞西班牙皇室，同每年金像獎獲獎巨星上台前都會請NaturaBisse的美容師，幫他們來個DiamondMagneticSpa令自己閃閃令。我係主角，等陣我成隻兔sharp晒，睇你雙黑眼圈點鬥！
「四季酒店的閃耀冬季spa，以混了鑽石粉的微鐵粉塗勻全身，七粒不同晶石放在身體指定脈輪（有點似穴位）上，打通全身氣流。然後治療師就用磁鐵將我身上的微鐵粉吸走～！感受到微鐵粉像黑頭柱般，連同負能量負情緒，躁/醋意都隨住治療師懸浮的手被抽走，留下滑溜溜閃閃令的鑽石粉在身上，摸落像塗了閃粉般，與含有鼠尾草同柏樹等的精華油被慢慢吸收，加上淋巴排毒按摩，同果酸面部護理！」做完spa，真係連個心都乾淨埋！

■就是這套NaturaBisse鑽石粉，助我回復溫柔心靈呀。$1,700/兩小時

■治療室採半環狀落地大窗，晨光透進來好似關島啲教堂！

12:00nn
嘆米芝蓮新年菜

心情靚靚肚仔餓，來個新春如意過年菜填肚先，去食二星米芝蓮餐啦！落地大玻璃的中菜廳紫逸軒延續剛才的好心情，新年期間有8道菜如意套餐，招牌乳豬件同香芒布甸不用多提了，而鴻運多寶翅，晶瑩又粗身的翅上還有燕窩，食完還不靚爆鏡？

■紫逸軒新春如意菜譜
（8道菜）每位約$738

■香芒布甸可是這裏星級招牌菜。

■黃金堆滿屋的釀蟹蓋，脆卜卜夠鮮美。

a.澳門四季酒店

地址：望德聖母灣大馬路
網頁： http://www.fourseasons.com/macau

01:00pm
睇片拜年利是折現

兔Su：「食飽心情靚，就去望望你兩隻熊貓有幾巴閉？」「三千平方米大的屋企有兩個大廳仲有個露天花園，羨慕死兔啦！」「喂！又話你哋參加咗成都熊貓館大拜年，有視頻拜年片段，同旅居各地的熊貓一齊向成都人拜年，十足紅白歌唱比賽咁好威喎！」懶洋洋的開開抱住碌竹瞓喺斜坡：「我哋屋企OK啦，但呢排天氣乾燥唔准出露天地方玩，要留喺濕度60-70%的房仔呀。大拜年條片已寄去成都，上月26號個熊貓嘉年華開幕典禮上播過一次，似乎我哋最young囉！想睇要入《熊貓嘉年華》個微博睇，但暫時好似唔太work，再講就真係赤口。你哋到我個網睇吓先啦，有我同心心由BB起拍的三條片睇！」
兔Su：「咁……你日日喺度做乜呢？會唔會好似安安佳佳咁匿埋唔郁？」掛喺樹上唔上唔落的心心：「唔會啦！我哋夠young嘛！呢度啲人來睇我哋，好乖o架，嘢都唔敢講多句怕嘈親我哋呀！」兔Su：「香港的安安佳佳盈盈樂樂要陪客食早餐，啲客又會親手整啲貓餅過佢哋食做手信，你哋使唔使呀？」開開：「我哋得兩歲，童工來喎！梗係淨玩仲要雙計唔使做啦！查實你們不用買手信來，這裏嚴禁餵食。若然你堅持，我鍾意食餅餅，心心鍾意搞破壞（剛剛爬樹才弄斷了樹枝，兩隻嘢無聊時掹爛木椅層皮），所以禮物最好折現。香港朋友們意思意思地封番封利是仔畀我就好啦！」兔Su：「你又真係爽喎!」

2011最新熊貓時裝！帽$25、小手袋$30

■記者同攝影師都買的USB暖包滑鼠墊！用時手塞在暖包，熊貓鼻還會着燈！$30

■在大熊貓資訊中心拿印有編碼圖案的明信片，向cam仔對焦，就可製作自己的開開心心明信片啦。

■門口有個拍卡機，澳門人用儲值卡咇一咇就過，畀十蚊我哋買餅餅。

■得意熊貓原子筆$5一支，筆筒$15，小熊貓軍隊各$15。

■學生們又興奮，又不敢大聲吵到小熊貓，好可愛。

b.澳門大熊貓館

地址：石排灣郊野公園熊貓館
門票：農曆假期（至2月9日）每日六場但只限票1,500張，每張$10，每人每次限購四張，12歲以下同65歲以上者免費。
網頁： http://www.macaupanda.org.mo

03:30pm
滿天黃金精華

兔Su：「開開心心兩隻嘢實在太頑皮，興奮過後又想唞唞。呀！明晚年初四就係接財神的日子！財神喺東南西北邊度呀？咦！前面嗰個咪就係財神爺！」財神：「兔Su來睇《水舞間》？《龍騰》都有新片呀，睇黃金雨吸盡黃金精華嘛，我初一至初四都喺度返工，記得來探我！我怕悶！」兔Su：「咁多小朋友來童夢天地找你同小龍玩，仲悶？」財神：「唔係哩，整張如意獎賞卡畀你，有機會贏一年會籍、入場證或玩具人人有份o架，12號就派完o架啦！」