如果煲呔rap歌令你毛骨悚然，八方推介大家聽聽真正嘻哈精神嘅rap，唱盡時弊嘅新晉rap友MastaMic又有巨獻，一年一度嘅《HKRapUp》2010版歌詞連MV經已面世。歌詞笑中有淚，唱盡香港人過去一年嘅喜怒哀樂。
串起一段香港歷史
MastaMic同八方講，喺創作過程當中，發覺香港社會不公嘅現象冇改變過，佢個人感受最深係菜園村遷拆問題，尤其係官員對待人民家園嘅冷漠態度。喺香港，政治歌冇市場，MastaMic都唔敢以政治歌手自居，只係純粹憑歌寄心聲。佢話好希望未來幾年可以繼續創作落去，咁十年後睇番轉頭，用呢系列嘅rap歌串連起一段香港歷史，都幾得意。
唔阻大家欣賞MastaMic嘅心聲，八方喺度節錄部份歌詞，一齊rap盡香港賀新歲：
唔使心急，又到10rapup，全香港市民都想知我今年會rap乜。
香港申辦亞運，唔少得小明同李家仁；李家仁醫生係新一代MC仁，小明上廣州，係咪小明參加亞運？比賽抱住個冬瓜猛咁趙，小明係冠軍。華叔用一生為香港人服務，我哋會繼續，你堅持嘅民主之路。
歌曲MV網址﹕ http://www.youtube.com/watch?v=uIJjAFt86b8