新正頭要兔氣揚眉，但賀年歌年年唱年年一樣，要不撚聲或用傳統喜慶腔可以嗎？無問題，找來樂壇新貴CAllStar以ACappella演繹新舊賀年歌mixandmatch，順道與大家一起尋回這些幾乎唱到爛的賀年歌源頭，原來一切得由抗日戰爭說起。
記者：蔡俊業
攝影：陳陶鈞、梁細權、譚盈傑、黃子偉
服裝提供：:Chocoolate（CAllStar）、Adlib（陳強、阿Bu）
髮型：RentonHung@ViaIlColpo（陳強）、MarvinLin@QGPrivatei（阿Bu）
抗日義士作曲贈興
找CAllStar在大年初一為各位賀新年，他們話會以ACappella形式演繹新舊賀年歌mixandmatch。其實，唱賀年歌已成為每逢過年的例牌菜，原來自古以來，中國民間或朝廷每逢過年都會大鑼大鼓的奏樂，直至近代，方有填上歌詞的賀年歌。七十年代初，賀年歌清一色是國語歌，當中最經典必是《恭喜恭喜》，就是「每條大街小巷，每個人的嘴裏，見面第一句話，就是恭喜恭喜……」此曲生於上海，由原名陳昌壽的陳歌辛於1946年創作，上海百代唱片公司出品，演唱的是當年中國最有影響力的作曲人姚敏及胞妹姚莉。據台灣研究流行歌曲專家兼老歌收藏家張夢瑞謂，日軍侵華時期，陳歌辛因創作大量反日歌曲而一度身陷囹圄，到1945年日軍投降後，陳氏急忙創作抗戰勝利歌，名為《恭喜恭喜》，原意是「恭喜」抗戰結束，因歌曲發表時剛好是1946年農曆年前夕，結果被民眾視為「賀年歌」，傳頌至今。
你愛哪首賀年歌？
記者上周訪問了多位藝人歌手，問他們哪首是「我最喜愛的賀年歌」，結果由汪阿姐與秋官於34年前合唱的《歡樂年年》最多人揀，貪其歡樂年年有，夠晒意頭！
《歡樂年年》（1977）
原唱：鄭少秋、汪明荃
作曲、作詞：關聖佑、江南
「你聽鑼鼓響一片，聲聲送舊年；你看大眾多歡暢，個個樂綿綿；歡呼聲、歌樂聲，響徹凌霄殿；齊聲恭祝你，有個歡樂年。」
謝安琪：《歡樂年年》
呢首歌真係經典，又簡單，「年！又過年！」提醒你新年又到；「歡樂年年」就好似講新一年要比上年更開心！
張敬軒：《歡樂年年》
好鍾意小鳳姐的版本，因為我覺得歌曲不只是祝福今年，亦希望每年都可以過得好開心！
盧思穎@aTV星光三班：《歡樂年年》
開心好緊要，如果人生無歡樂就生存都無意義，所以希望新一年個個都開開心心！
《恭喜恭喜》（1946）
原唱：姚莉、姚敏
作曲：陳歌辛（慶餘）
「每條大街小巷，每個人的嘴裏，見面第一句話，就是恭喜恭喜；恭喜恭喜恭喜你呀，恭喜恭喜恭喜你。」
井柏然：《恭喜恭喜》
每次過年都會聽群星唱這首歌：「恭喜恭喜恭喜你呀！」實在是一首很流行的新年歌曲。
孫耀威：《恭喜恭喜》
呢首歌太深入我心，且佢係老派賀年歌中唯一一首我識唱晒，實在無一首歌紅得過佢！
《迎春花》（1977）
原唱：鄭少秋、汪明荃
作曲、作詞：關聖佑
「好一朵迎春花，人人都愛它；好一朵迎春花，迎來大地放光華；好一朵迎春花，它開每一家；好一朵迎春花，茂盛艷麗春色雅。」
On仔：《迎春花》
每逢新年都聽到，但咁多年來我唔知「春花」係乜，仲以為「春花」係一種花！
《恭喜你》（1973）
原唱：文千歲、李寶瑩
作曲：古曲旋律
作詞：龐秋華
「恭喜你，恭喜你，大家新年添新禧，賺錢多多笑嘻嘻，買屋買田又買地；恭喜賀喜，喜上加喜慶雙喜，更祝每年獲厚利。」
陳柏宇：《恭喜你》
每年要同人講的恭喜說話，全部喺首歌入面，拜年都可以唔使講，齋唱都夠！
釗峰：《恭喜你》
呢首係賀年歌代表作，最鍾意係「恭喜，賀喜」那個「賀~~喜！」要轉音，細個聽已覺搞笑！
Jase：《祝新歲》
首歌有好beat好groovy，聽住首歌可以印吓跳吓，幾好玩！
郭書瑤：《財神到》（劉文正唱國語版）
希望大家就是有很多很多的財富和福氣，所以我選這首歌！
King：《拜年》
過年梗係要「拜年」啦，拜年時會講恭賀說話和祝福語，首歌包含晒！
粵劇×賀年
粵語賀年歌流傳至今已有近40年歷史，歌手及藝人參與節目表演時都必定會唱，尤其是《歡樂年年》及《恭喜你》，其實這兩首賀年歌，版權皆屬風行唱片公司。已故多年的創辦人鍾錦沛成立風行前，曾在電影圈專責配樂，經典作品《青青河邊草》便出自其手筆。六十年代初國語歌雄霸本地歌壇，所謂「賀年歌」就是以國語歌及粵劇兩種形式表達。「當時每逢新年都會做大戲，一開場第一隻歌必定要玩《六國大封相》，潛移默化，那時的人一聽見《六》這首歌，就知新年來了。」風行唱片總經理林錫堅（Andy）指，這種「粵劇×賀年」的背景正是現今賀年歌的起點，風行推出首張中樂黑膠唱片《龍飛鳳舞》，就是以喜慶方式演奏粵劇曲目，因反應不俗，賀年音樂市場逐漸成形。
《歡樂年年》銷量30萬
1973年，鍾先生邀請文千歲夥拍李寶瑩推出《大家恭喜》專輯，推出後市場反應熱烈，據資料顯示，由推出至今，此專輯的黑膠唱片、卡式帶及CD總銷量約20萬張。後來，汪明荃及鄭少秋合唱的《歡樂年年》又再中寶，還於當年的《金唱片頒獎典禮》獲頒贈金唱片榮譽（歷年累積銷量達30萬），且亦成為經典賀年歌。雖然近年有全新創作賀年歌，但叫座力怎也不夠舊歌強，Andy認為成功的賀年歌，必找紅歌手演繹，「搵鄭少秋和汪明荃、李寶瑩和文千歲是因當時他們最紅，所以一唱就爆，到後期還有許冠傑的《財神到》、甄妮的《祝福你》等，可能由陳奕迅唱會帶起另一個潮流都唔定！」資深樂評人馮禮慈則認為，新年唱舊歌問題不大，「外國人過聖誕時，都是唱幾十年前的舊歌，因大家對這類歌要求跟流行歌唔同。」英皇從Twins年代開始將舊賀年歌「翻新」，他直言：「就算不是超勁成功，都算OK成功，例如有一年Twins扮小鳳姐，能夠掀起話題，證明當時大家受落。」
反傳統靠李家仁
對於年年都唱同一首「年又過年」，商台叱咤903的陳強直言「一聽傳統賀年歌就想作嘔！」有無方法解救呢？有，就係靠李家仁醫生出手，唱《小明去拜年》。「呢首歌好創新，我想如果今年唔撐，下年就無人再播或無其他人翻唱，以致沒有新賀年歌加入個list！最重要是必上《都市閒情》唱，在YouTube就會有人forward，首歌就會hit喇！」阿Bu亦所見略同，「李家仁醫生那首反傳統，大人覺得好意頭，小朋友又好鍾意聽，年輕人又聽得好開心，真係合家歡呀！」若覺得賀年歌rap得來太騎呢，記者強烈推介《天下無雙》原聲大碟，配樂由陳勳奇、陶一陌及RoelA.Garcia聯合創作，當中的《序曲》以超搶耳的嗩吶演奏，甚有新年氣氛，可惜此唱片已絕版，惟有上YouTube止止渴吧！
http://www.youtube.com/watch?v=p150LJ2HYm4
