旺足兩年的冧莊視帝視后黎耀祥和鄧萃雯，在大年初一宣佈繼人氣劇集《義海豪情》後將第三度攜手合作。不過，雯女與祥仔今次並非合作拍劇，而是一起拍攝保險廣告搵真銀。祥仔希望今次與雯女首度時裝look拍檔能起化學作用，吸納更多搵銀合作機會，實行兔年賺個盤滿缽滿。 撰文：戴彩煥
今日大年初一，視帝黎耀祥和視后鄧萃雯齊祝本報讀者兔年旺足全年，身體健康，萬事勝意。儘管祥仔近日忙於拍攝無綫新劇《法證先鋒III》，雯女也忙於出席佈道會，但二人日前仍抽空為本報拍攝賀年照，祥仔舞獅時，雯女在旁打鼓，合拍非常。
前年祥仔與雯女在李添勝監製的《巾幗梟雄》中首度合作，結果為二人贏了人生首個視帝視后殊榮，至去年原班人馬再次合作《巾幗梟雄之義海豪情》，竟又再次為二人事業帶來另一高峯，齊齊冧莊做視帝視后，旺足兩年。
合拍廣告財源滾滾
問雯女會否再跟祥仔合作拍劇，她說：「我估短時間內都唔會，因為我想試吓跟唔同對手合作，多啲新火花，對觀眾嚟講又會有新鮮感。」雖然難再見到二人合作，但原來這對好拍檔近日已秘密地第三度合作。雯女說：「係幫一間保險公司拍廣告，雖然過去兩年我哋好多時都會一齊出function，但一齊拍廣告都係第一次囉。」
祥仔說：「之前兩次同雯女合作唔係民初就係30年代，今次第一次係時裝，而且仲係我哋第一次合作拍廣告，真係幾難得，所以今次酬勞反而冇乜所謂，唔係我考慮接唔接嘅因素，因為個廣告客戶用我哋兩個拍已經開支好大，反而係我見未試過，覺得幾新鮮、幾得意，可以畀大家睇吓我哋合作嘅時裝look，所以作為一個新開始試吓，希望起到化學作用，分分鐘其他客戶見到出嚟效果幾好，陸續搵我哋拍住做都唔定。」
祥仔珍惜搵錢良機
不過，雖然今次只是拍廣告，且又是時裝版本，但祥仔笑言賺得一點也不輕鬆，一分一毫也得來不易。祥仔說：「嗰日拍咗15個鐘，由上晝9點拍到凌晨12點至收工，拍咗10條不同版本嘅廣告片，個妝同個景要轉成10幾次，仲辛苦過拍劇。嗰日拍到凌晨12點之後我仲要即刻趕返公司開廠拍《法證》，真係攰到唔識點形容！」
今個農曆新年，祥仔如去年一樣沒有「收爐」，繼續由年三十晚做到年初十，而且為搵銀連續兩年未能跟囝囝一起過新年。祥仔說：「年三十晚先去大馬做騷，跟住年初一返嚟即刻轉機去美加巡迴演出，差不多初十先至返嚟，因為個仔初十要返學，跟唔到我哋兩公婆去。」連續兩年未有陪囝囝過年，囝囝可有怨言？祥仔說：「佢冇，搵食艱難，個仔都明白爸爸工作都係為咗個家。趁家時勢幾好梗係搵得就搵啦，雖然我身心好攰，但有嘢唔通唔做咩！我相信出年未必有咁多機會，出年又會輪到第二個o架啦！我入咗行咁多年，都好明白喺呢個圈嘅遊戲點玩。」
雯女重視家庭團聚
祥仔新年繼續忙碌搵銀，雯女卻剛剛相反，趁農曆新年跟家人共享天倫。雯女說：「其實我今年同舊年過年完全一樣，都係一早收爐，同屋企人一齊過。之前我忙住做嘢同埋做佈道會，冇乜時間陪屋企人，新年正好係個機會。」
攝影：林德雄
服裝：裕華國貨
場地：陸智夫國術總會
髮型：KelvinKooofhair（鄧萃雯）、IvanLeeofHeadquarters（黎耀祥）
化妝：OmixB（鄧萃雯）
