樹仁新傳系學生上年底約「環保觸覺」做訪問，對方提出條件，要學生幫忙做三小時義工。學生要求環保觸覺解釋點解做訪問要「等價交換」，主席譚凱邦話做訪問要花時間，以義工鐘數交易好合理。
等同「有償報道」
事件竟然鬧大，新傳系發電郵譴責譚凱邦，指訪問要「等價交換」好荒謬，違反新聞無償原則。譚凱邦不示弱，出聲明話以後唔接受樹仁新傳系訪問。新傳系系主任梁天偉同八方講，話任何人都有權不接受訪問，但學生亦冇理由以義務工作去「換取」訪問，佢撐硬學生。
譚凱邦強調無意踐踏新聞自由，真心希望學生透過做義工推動環保，又話學生未經佢同意就公開雙方私人電郵，似亦有違操守，或會向記協投訴。記協主席麥燕庭指「學生記者」都係記者，以做義工交換訪問，其實似「有償報道」，會令人質疑報道唔公正，希望所有團體組織唔好咁做。