恒大今季升上中超，不斷傳出斥鉅資收購外援，之前就傳過想簽熱刺嘅克羅地亞中場卡蘭積卡，結果都係「無米粥」，今次嘅傳聞仲勁，就係出到1,000萬美元轉會費畀俄超嘅莫斯科中央陸軍，想簽日本中場本田圭佑，仲預咗300萬美元年薪畀本田㖭。不過本田啱啱先幫日本贏亞洲盃，仲做埋MVP，24歲仔又當打，歐洲大把球會想簽佢，恒大係唔係吹大咗呀？