中國藉胡錦濤訪美之便，推出中國形象宣傳片，不惜工本製作，在美國媒體大灑金錢，最開心嘅應該係接到呢單大job嘅廣告公司，依行規賺佣嘅話，好發好發，今年過肥年。但是否可以收足佣，還是要為國「效勞」，收少少就算呢？有人知道嘅話，唔該通知一聲。
左丁山未曾睇過宣傳片足本，無以評論，但睇電視新聞節錄，有一樣覺得好奇怪，就係宣傳片之文字全用簡體字，但中國兩字就用「國」（繁體），唔用国（簡體），唔通北京認為「中国」不及「中國」咁美觀？如果係嘅話，請趕快取消「华」呢個字，將「中华人民共和国」改番成美觀的字體「中華人民共和國」。
宣傳片主題為ExperienceChina，宣傳中國興起、推銷軟實力，希望能逐步爭取話語權。當然呢次只係起步啫，爭取話事權唔係話咁易，要付出好大代價o架，你估齋talk就得咩，以埃及為例，當埃及政局突變，不知如何發展下去，中國對埃及事件嘅最大反應就係保持沉默，對外不發一言，對內就在互聯網刪除敏感字眼，傳媒盡量少報道，一個大國對非洲最主要國家嘅三十年來最重要大事，作如此反應，直情係完全放棄話語權，閂埋門做皇帝就算。
美國呢？國務卿希拉莉對美國電視台講埃及，左一句wewanttosee右一句wewanttosee，好似佢唔like，埃及就唔掂咁款，豈止有話語權，直情當正自己有話事權。事實上，無論啲歐洲左派如何痛恨、批評美國，一旦有重大事件發生，譬如埃及，歐洲國家與知識分子就會望住美國，希望美國扮演國際警察，扮演斡旋角色，搞定埃及，讓歐洲坐享其成，甚麼話語權都唔要咯，更唔敢話事。美國呢，國債已達十四萬億美元，日日向中國日本伸手（賣國債也），但仍要硬着頭皮做國際警察，因為只有佢先至有兵力及歷史影響力嚟鎮得住。過往美國對莫巴拉克之獨裁貪污不聞不問視若無睹，只因莫巴拉克願與美國友好，到佢唔掂嘞，美國人就要佢下台，另搵一個viablealternative。世界大勢如此，中國要宣傳軟實力，爭取話語權？當作旅遊廣告可也！