全靠阿爺包機去埃及撤僑，滯留當地港人先至可以搭「順風機」返來，中央厚待香港人，特區政府點都要有啲表示先得，噚日保安局副局長黎棟國同傳媒會面，講述最新包機安排時，領銜主演一幕「報恩記」。
話說黎棟國答咗近三條香港傳媒機構嘅問題後，就企圖轉身走人放工，用身體語言宣佈記者會到此為止，點知當佢轉身準備走人時，身旁嘅新聞官卻即時大叫：「仲有中央電視台要問問題。」一聽到「中央台」三個字，黎棟國即時急停轉身，急急腳站回咪高峯前，企定定等中央台記者提問，然後恭恭敬敬用普通話回答，中央台記者滿意收貨，黎副局先敢收工。你知啦，如果國家宣傳機器有乜不滿，後果可能好弊。
在場港記睇見中央台「大晒」都好冇癮，有正牌CCTV在場，CCTVB頓時靠邊站。