踏入兔年，今明兩年四大選舉接踵而來，積極中興嘅自由黨搶先出閘，八方聽聞黨主席劉健儀等高層，大年初九會帶隊到西環中聯辦拜年，榮譽主席田少應該都會現身。
需知道西環係特區第二支管治隊伍，係建制派選舉協調幕後黑手，自由黨博在區選中有啲成績，獲西環祝福係關鍵，至於拜年有乜收穫，稍後分曉。
重出江湖嘅田少在兔年會主動出擊，廣開地區辦事處事在必行，八方聽聞自由黨仲打算在港鐵東鐵沿線月台賣燈箱廣告，向沙田、大埔、北區街坊拜年，主角係田少及劉健儀，至於第二、三梯隊有冇份，暫時未有定論，如果談妥價錢，廣告好快就出街。