過年前特別多人買鞋，但競爭咁大，點樣突圍其實好考功夫。主要經營WalkerShop嘅盈進集團（1386）噚日就宣佈，委任李均雄做公司獨立非執行董事，接替辭任嘅曾令嘉。
呢位李生有乜特別？雖然佢同曾生同樣係律師出身，但係睇佢履歷，就可能好幫到手，皆因李生做過聯交所上市科高級經理，家係6間上市公司嘅獨立非執董，包括賣胸圍嘅安莉芳（1388），而最啱使嘅，係佢之前做過已併入百麗（1880）嘅美麗寶（Mirabell）非執董，照理賣鞋難唔到佢。
盈進經歷過09年度嘅蝕錢經驗，舊年應該賺番錢，但係點樣喺一眾賣鞋公司之中突圍，睇嚟要搵好似李生呢啲老手幫吓忙。