香港地產財閥壓榨小市民賺到盤滿缽滿，但只要動吓腦筋，返轉頭賺錢都唔係冇可能，幾個80後製作嘅大富翁式遊戲《地產霸權》農曆年前推出，初版500副喺年宵市場售賣，每副賣150蚊，負責人之一Michael同八方講，遊戲十分暢銷，500副幾近沽清，僅餘少量作公開拍賣為支聯會籌款。
發咗筆新年財，Michael話盈利剛剛好夠做製作第二版《地產霸權》遊戲成本，新版會加料新增THEICON同解釋世界各地地產霸權嘅情況，原來好多通識科老師買入遊戲做教材，所以新版會加入多啲資料性內容，學生可以寓學習於遊戲。有人要求八方代為反映，希望《地產霸權》遊戲可出iPhoneApp，Michael話曾考慮，但成本最少要六位數字，負擔唔起，短期內不成事。