兒時是個賣菜仔，浸過鹹水後成為義肢矯形師；05年回流香港創辦專為長者配對安老院的社會企業，五年後成為十大傑出青年，年僅27歲的黃卓健下一站要到內地創立「動力貨車」，穿州過省走入窮鄉僻壤為殘障人士裝義肢。誰還敢說，80後勇往直前會「車毀人亡」？
放棄高薪職位回流
兩、三歲的黃卓健，晚晚凌晨兩三點便被父母弄醒，被「秤住」由大帽山搭車到元朗取貨，然後在街市檔「幫手」，「嗰陣時真係見盡人生百態，由個小朋友去秤菜喎，啲人會信唔過，又會覺得你揀嘅菜唔好」。有人或會認為賣菜是厭惡性工作，付出多多收穫少少，黃卓健卻十分懷念：「雖然要好早起身，但就令到啲阿婆好易咁飲完茶之後，一落街市就買到條菜返屋企，都好開心o架。」
他在美國賓夕凡尼亞大學念生物科技，畢業後選擇了一份冷門職業：義肢矯形師。「其實揀呢個職業都受細個經歷影響，嗰時過關返鄉下見到好多人無手無腳，好慘。」在瑞典做義肢矯形師時月薪高達港幣七萬元，相信沒有多少人會像他有這股儍勁，05年因為受香港一宗虐老個案打動而突然回流，創辦專為長者配對合適安老院的社會企業「長者通」。
可能跟他熱愛中國傳統文化有關，因此對「孝」特別重視，願意毅然放棄高薪厚職。家人支持不可忽視，哥哥是銀行高層，姊姊是補習天后MiaWong；無家庭負擔，才可捱過首年零收入的日子。別以為安老院到處是，何須假手於人配對？「其實唔容易o架，有啲長者鍾意靜嘅地方，有啲想有多啲娛樂，有啲想同鄉里一齊，我哋會做配對，最後只向獲推介嘅院舍收取費用。」
望上山下鄉助傷殘
黃卓健不時到安老院明查暗防，視察院舍環境及服務，以免作出不良推介。五年來成功協助兩萬長者「上院」，去年他獲選為十大傑出青年。但他的助人目標不只香港，而是整個神州大地。他指內地每年新增殘障個案至少10萬宗，殘障人士不少於5,000萬人，但僅有550位義肢矯形師，「即使佢哋日日冇時停，做到死都未必裝得晒」。
無國界醫生幫助戰亂中死傷者，奧比斯則專為盲人重見光明，黃卓健心想「點解冇個大型組織助殘呢？」他為自己定下目標，希望終有一日在內地成立「動力貨車」，「去到各個村落、走入山區，幫啲殘疾人士裝義肢。呢批人平時都唔落山又出唔到城，冇人幫到佢哋。」
黃卓健最近在田北辰的邀請下加入了新民黨，除了因為該黨提倡將中國歷史列入必修科，深得這位出口成文的「番書仔」歡心，也因為該黨招攬不少退休高官，有助自己向他們「收風」，了解為何一些幫助長者的建議不獲接受，「在位高官唔肯講真話啫，退休嗰啲肯喇啩」。記者許偉賢