年宵乾貨檔生意暢旺，濕貨檔卻是另一個世界。售賣桃花及水仙的檔主們大嘆生意慘淡，歸咎寒冬令桃花延遲開花，更指市民只想最後一日「執平貨」，經常大幅壓價，有檔主不甘心血賤賣，決定不會大平賣，誓言「丟咗都唔益人」。
維園濕貨區人流不多，與乾貨區的水洩不通成天壤之別。部份檔主將開得合時的桃花抬價，但專營大埔林村桃花的煊哥卻指，今年桃花整體售價其實比去年便宜，「好多檔根本冇賣貴到，我賣平咗三成，但都係冇人買」。
「屋企細擺唔落」
煊哥昨晚已心灰意冷，只坐在檔內休息，沒有叫賣促銷，「客人好閹尖，成日要我平啲畀佢，600蚊減到400幾蚊都唔得，唔捨得使錢」，他預料在租金及來貨價升三成下，今年將蝕本收場，但今晚凌晨會將桃花搗爛才掉棄，「等啲人想執都冇得執」。
另一名桃花檔檔主李先生指今年生意是近10年來最差，肯定無法回本，今晚會減價促銷，但底線是半價出售，「花農成年心血，唔想將啲花賤賣」。有售賣水仙的檔主見生意不理想，日前已將原來一盆多頭的水仙拆散出售，「逐頭賣，希望快啲去貨」，她希望今日盡力促銷，希望減少賣剩後需支付的運輸費。
年花滯銷，有市民認為與現時普通市民居所越住越小有關。市民葉先生指，逛年宵也不會考慮買桃花，「屋企細，又唔係過千呎，點擺得落桃花」。他認為近年香港人多外遊避年，令買年花意欲大大減低，「我過年都會外遊，年花放喺屋企冇乜作用」。
本報記者