狡兔三窟，原來肖猴嘅特首煲呔，都精通呢種左閃右避嘅伎倆。繼去年打破傳統，唔去全港最大嘅維園年宵後，煲呔今年再創先河，到荃灣行花市竟然冇通知傳媒採訪，帶埋老婆靜靜雞去沙嘴道遊樂場年宵市場，買咗土產蜜糖、原創兔仔掛飾同埋劍蘭、銀柳、五代同堂等年花，總共使咗意頭價888蚊。
話費事阻人做生意
特首辦發言人解釋唔公開特首去花市行程，係唔想傳媒採訪阻住年宵攤檔做生意，搞到秩序大亂。其實維園年宵市場近年已成不受市民歡迎政治人物禁地，皆因好多80後賣諷刺高官、政客物品，因此民建聯今年改到荃灣年宵市場擺檔，為勢所逼，煲呔不得不避走。
喺煲呔去荃灣花市之前，線人向八方報料，話早兩日在旺角花墟年宵市場，目睹新聞處人員同新聞統籌專員何安達現身，有人手持場地平面圖指指點點，相信係為準備煲呔行花市預先「踩線」，最終煲呔冇去維園，又唔到花墟，選擇西進荃灣，果然狡猾。最無奈應該係新聞處人員，去花墟白行一趟。
政府今日播出特首夫婦賀年短片，去年搭上麥兜、麥太後，煲呔可能愛上人獸片種，今年同幾隻侏儒兔、賓尼兔同家兔一齊上鏡向香港人拜年，好彩拍埋出年煲呔就夠鐘收工，否則蛇年到，佢隨時要在禮賓府玩蛇。
專家指導抱兔拍片
煲呔在facebook稱同兔仔合作指出有唔少學問，要在場動物專家協助，指導抱兔方法，佢又透露短片內容係話有幾個小朋友到禮賓府拜年，點知攜同拜年嘅兔仔忽然走失，大家就四圍搵兔，煲呔希望市民唔好對佢嘅演技有任何期望，反而幾個小朋友同幾隻兔仔好專業，好少NG。
煲呔咁講，唔通係暗寸賀歲猛片最佳男主角賭王？抑或想搵機會向賭王請教如何做戲呢？煲呔又借題發揮，叫市民飼養寵物前要認真諗清楚做主人嘅責任，記得漁護署呼籲「停一停，諗一諗」，決定飼養寵物，就要愛護同照顧寵物一生，唔好遺棄。
mailto:[email protected]