「大嚿」陳偉業上周三喺立法會辯論辛亥革命百周年紀念時，直斥高官林D9係「狗奴才」，民記主席譚耀宗護主心切，向主席曾鈺成投訴陳偉業言論違反議事規則，曾鈺成惟有暫停會議處理。陳偉業未待曾鈺成裁決就快閃離開議事廳。曾鈺成最後裁定「狗奴才」屬冒犯性言論，議員日後唔應該再用。
黃毓民噚日爆料，指其實都擔心講完「狗奴才」後不能重回議事廳，因此發言前買重「三重保險」，首先係問法律界議員吳靄儀意見，再向立法會秘書處詢問議事程序，最後問埋立法會秘書長吳文華，確定即使陳偉業言論被裁定屬冒犯性，亦唔使被逐離場，即係陳偉業可施施然返回議事廳。黃毓民坦言，冇諗過一句「狗奴才」會搞出咁多手尾。陳偉業要威，自然要戴幾個頭盔，黃毓民你唔係唔知道嘛！