年廿九，大家洗完邋遢後，已經充滿放假心情準備送虎迎兔，不過仍然有好多人唔得閒，何家幾房人上上下下固然忙個不停，聲稱係賭王代表律師嘅高國駿亦可能隨時要陪賭王上鏡，八方相信佢過年都唔會太得閒。呢幾日忙到出煙嘅仲包括警方，大除夕未到，已經要準備開年。
挨年近晚，政圈吹淡風，多個政黨轉戰維園年宵市場做宣傳籌款，不過唔好以為會有好多呢啲天下太平和諧日子，事關踏入兔年不久，就係一年一度公佈財政預算案大日子，加上今年係選舉年，因此各大政黨已召集黨員新春期間到政府總部或西環「拜年」，促請政府改善民生、爭取民主。
了解遊行示威性質
八方收到風，警方呢幾日派員與部份政黨、社運團體接觸，無事不登三寶殿，專人致電當然唔係拜早年，而係非正式查詢各政黨、團體有冇計劃喺農曆年期間搞遊行抗議示威。據知警方向有關人等送上「溫馨提示」，提醒佢哋要申請不反對通知書。有獲警方關照嘅政黨中人向八方稱，相信警方係想事先「摸底」，了解吓遊行示威性質、參與人數等資料，以便上頭部署警員駐守在政府總部同西環中聯辦，因應情況對付示威者。
根據八方得到消息，社民連一馬當先，大年初一就直踩政府總部「拜年」，主席陶君行話要求政府幫助基層市民對抗通脹，否則貧富懸殊嚴重，兔年社會恐不得安寧；「新民主同盟」大年初四出動，向政府反映市民爭取民主訴求，其他大小政黨、團體分別在大年初二、初三上街，輪流向高官「拜年」。
準備隨時抽調人手
今年唔同往年，家陣個警隊一哥作風強硬，事先收風查問政黨、社運團體示威遊行詳情，八方相信警方可能已準備好抽調人手強陣以待，喺政府總部同西環部署重兵「招呼」示威者，如果大家「拜年」情緒高漲，帶埋香檳、奶粉上門，八方恐怕一哥即使在大年初一都會毫不猶豫，即時下令為大家「開年」！
mailto:[email protected]