埃及局勢惡化，震散花旗股市，歐亞股市亦無可倖免，噚日港股一開市就下試50日同100日線，市場氣氛都幾淡，不過兩條平均線構成嘅支持區係重要技術位，好友冇咁易棄守，結果恒指都可以升番上去收市，報23447，跌幅收窄至169點。
技術上港股形勢已轉穩，如果埃及局勢緩和，港股可以部署反彈，不過10日線剛下破20日線現死亡交叉，23880水平嘅阻力大增，限制恒指反彈空間。
中行C輪27386：中國銀行（3988）平收4.05元，力守4元關後反彈，反覆回落多日後，係時候出現技術反彈，4.13至4.16元係短線阻力區，突破上望4.28元，可以諗吓隻C輪27386。
隻輪現價13仙，2011年6月7日到期，行使價4.28元，溢價8.9%，引伸波幅28.6%，槓桿率31.2倍（有效10.2倍），正股升上4.28元，27386睇23.9仙，升幅超過8成，幾吸引，正股跌穿3.97元就沽咗隻輪止蝕。
俊樺