眨吓眼今日已經係年廿八，回顧虎年香港經濟雖有起色，但百物騰貴，樓價有升冇跌，仲成為全球樓價最貴地區；地產霸權下升斗市民想安居樂業唔容易。嚟緊嘅兔年又點呢？
政要、富豪御用風水堪輿大師蔡伯勵噚日喺一個港台節目度預測，香港整體運勢兔年好過虎年，經濟勢頭好，帶動各行各業，尤其係金融業，地產就麻麻，唔通暗示樓價會下滑？至於股市，蔡師傅話今年會升，特別係春季，各位股民留意喇。
肖龍者有六害凶星
至於特區管治班子，似乎以有份跑馬仔嘅唐英年最擇使。因為蔡師傅話，十二生肖中，肖龍者有六害凶星，即係同太歲溝通唔到，係小人當道之象，被人搬弄是非，陰謀破壞，稍一不慎，就會是非纏身，俾人篤背脊。
八方睇嚟，屬龍嘅唐英年，近排向80後、90後開火發表「車毀人亡」言論，已招口舌之尤；西九管理局成立不足兩年又有15名管理層劈炮，連CEO謝卓飛返工幾個月都提早走人，連累唐唐備受質疑；加上明年就係下屆特首選舉，之前一定好多暗湧，可謂處處危機，一唔小心，點知會唔會「車毀人亡」。不過，蔡師傅補充，肖龍者來年仍有吉星高照，有財有喜。
肖猴嘅煲呔又點呢？蔡師傅話，肖猴者來年有「小耗」凶星，意味煲呔會遇小阻滯，但因有吉星「月德」相照，應可化危為安。其實煲呔已經搞掂政改，餘下一年半任期都冇乜重任牽掛，只要香港無風無浪，相信唔使腳痛。而且政府總部今年搬去添馬艦，蔡師傅大讚選址同設計風水好，係「天門開地戶閉」嘅格局，可以左右逢源。
爆李超人為孫改名
其他生肖方面，蔡師傅話大部份流年唔錯，只係肖雞及肖馬者分別冲同刑太歲，運氣麻麻，要慎言慎行，小心交友，其中肖雞者可戴龍或狗飾物幫助運程。肖牛者則要留意家中長輩健康。
蔡師傅仲爆咗富豪好友兼老主顧李超人一個小秘密，就係超人咁多個孫，個名都係超人改，但會問吓蔡師傅意見。至於近排有冇新孫要改名，蔡師傅就好口密，笑笑口話唔知道。
mailto:[email protected]
【農曆年宜忌】
食團年飯好日：年廿七至年三十晚均可
初一拜神好時辰：首選凌晨12時半至1時，次選半夜3時半至早上9時
開工/開市好日子：初六，但屬鼠人士相冲不宜，可選擇初五開工
今年是否宜嫁娶？：今年雖非雙春兼閏月，但初二立春與春牛圖相配，今年宜嫁娶
資料來源：蔡伯勵