話國家副主席習近平係「習總」，喺內地肯定好大件事，話唔定係死罪，唔死都可能要坐一世監。但係喺香港就冇問題，邊個話？咪就係影視處囉！影視處上個月收到投訴，有人投訴商台節目《在晴朗的一天出發》主持，在去年10月19日節目中叫習近平做「習總」，由於與「雜種」同音，投訴人認為節目主持侮辱國家領導人。
影視處：不構成侮辱
點知影視處查完之後，指主持只係叫習近平做「習總」，即係未來中共總書記，即使與雜種同音，但不構成侮辱，投訴不成立。
影視處上月處理咗236宗對電視同電台節目嘅投訴，其中一個係投訴亞視去年10月30日嘅6點新聞，報道快餐店員工用膳時間唔計工資嘅新聞時，記者竟然口快快將肯德基讀咗做肯德雞，認真爆笑。是是旦旦嘅無綫新聞都被投訴，去年10月8號嘅6點半新聞，報道劉曉波嘅新聞時，記者竟然話劉曉波係因為「革命罪」入獄，喺中國反革命先至係罪大惡極o架。亞視同無綫新聞同被裁定為輕微違規。