上個禮拜六，日本1:0擊敗澳洲捧走亞洲盃都幾有話題性，因為功臣分別係意籍教頭沙哲朗尼，同韓裔前鋒李忠成兩個「外來客」；而且李忠成同埋助攻嘅長友佑都分別有個靚靚明星女友喺背後默默支持，難怪可以一躍而起成為國家英雄喇！
外籍教頭旺日本
日本喺亞洲盃決賽入面，主帥沙哲朗尼調動得宜，換入南韓裔嘅前鋒李忠成一箭定江山，令呢兩個異國人做晒當晚嘅主角。更加令日本人覺得尷尬嘅係，佢哋雖然喺20年內破紀錄4奪亞洲盃，但分別由荷蘭嘅奧夫特（92年）、法國籍杜斯亞（00年）、巴西籍主帥薛高（04年）同埋沙哲朗尼（11年）4名外籍教練領軍，本土教頭就一個都冇份，難怪沙哲朗尼賽後好風騷咁話：「日本喺亞洲已經難尋敵手，睇唔到一支球隊可以超越我哋！」
長友佑都被踢爆戀AV女
不過話時話，李忠成同長友佑都表現咁好都有段古嘅；之前講過好多日本球員嘅另一半都有啲名氣，而李忠成嘅女友亞由美就係個女明星，同前者一樣都係喺日本出世嘅南韓後裔。不過亞由美唔同李忠成嘅係，先喺祖國南韓開始演藝生涯，亦有返日本工作，仲試過同日本當紅女星蒼井優一齊拍廣告㖭。男女兩人嘅成長經歷相似之下，自然容易啲傾密偈，互吐苦水同彼此扶持，感情緊係突飛猛進；所以做咗大國腳嘅李忠成喺第2次代表日本上陣就入咗球靚波，幫日本捧盃囉！
助攻畀李忠成嘅後衞長友佑都，就俾日本雜誌踢爆有個新女友，佢就係樣子甜美、肌膚潔白無瑕嘅AV女優星野飛鳥。據報佢哋秘密約會嗰陣俾八卦人士影低相，之後就揚咗呢段戀情出嚟。喺愛情魔力下，李忠成同長友佑都能夠幫日本隊封王，證明每個成功男人背後都有個女人支持！