一個接一個嘅政團喺虎年結束之前「誕生」，其中絕大部份都係喺原有陣營分裂出嚟。《城市論壇》噚日就請咗由社民連同民主黨分裂出嚟嘅兩個政團人民力量同新民主同盟，以及葉劉拍住田二少搞嘅新民黨做講者，剖析吓呢股政壇新氣象。
一笑置之
其實田北辰同大佬田北俊長相唔似，但噚日先後被人民力量代表李偉儀以及台下嘅人民力量支持者錯叫為新民黨田北俊，要其他人糾正，唔通喺人民力量眼中只有田大少而無二少？被叫錯名嘅田二少只係一笑置之，冇乜反應；佢喺論壇開始前更加主動着返件桃紅色嘅「黨背心」，同坐喺隔籬嘅pinklady李偉儀襯晒色。