金融界成日都話人才渴市,要吸引多啲才俊加盟,美國萬通亞洲諗到條新橋,介紹到新人入職、而嗰位新人又過到試用期嘅話,嗰名推薦人嘅客戶經理,會獲贈iPad一部。
用iPad吸納人才,華華都係第一次聽。首席市務總監蕭莉玲話,呢招都係希望喺年頭第一季搞吓噱頭,提升吓啲理財顧問嘅裝備。
除咗iPad,美國萬通年年都由常務董事兼總裁鄭慶藩帶隊,同啲跑夠數嘅客戶經理去旅行,獎賞一吓佢哋一年嘅辛勞,2月尾就起程去日本,萬通話,下年會去杜拜,相信會為班前線員工帶嚟更大嘅推動力喎。
至於今年嘅加薪幅度,鄭慶藩透露幅度係介乎6%至8%,花紅方面都有幾個月o架,跑贏通脹喎!