最近收到一封由理財版轉寄嚟嘅電郵，讀者周先生今年26歲，擁有碩士學位，家陣做Marketing，月入萬二蚊。呢位80後理財都算有計劃，流動資金有成百萬，仲有兩份保險，一份係有儲蓄成份嘅壽險，另一份就係純儲蓄。
周先生目標係30歲前買樓結婚，換言之，佢嘅問題直接嚟講，100萬本，4年後要賺夠首期同結婚費用。周生冇提到要搵層點樣嘅樓，要辦個點樣嘅婚宴。不過，電郵裏面有提及「由於本人已有首期，所以目標是希望可以為資產進一步增值。」
以100萬做首期，計埋買樓時嘅律師費、釐印費，同之後嘅裝修費，買個200萬樓價嘅單位，勉強可以應付。買樓一般都要預番樓價一半做首期，除非你買按揭保險借盡按揭。200萬嘅樓家陣選擇唔多，但4年後嘅事whoknows？
首期唔使閉翳，結婚更加豐儉由人，然則以現時敏妮掌握到嘅資料，未能夠量化周先生嘅理財目標，咁好難定出投資策略。
不過，周先生嘅case，係一個非常典型嘅例子：有資金，但唔識點投資，亦冇投資經驗，希望有人建議佢點樣做，錢「生」錢。
資金增值要穩陣 可學期權
敏妮嘅建議係，請周先生唔識就去學到識，事關100萬本錢，雖然話少唔少，但喺投資市場又真係唔算多，起碼唔可以分幾份，由唔同嘅基金經理幫你管理。一注押落去一個基金經理度，如果押錯注，冇仇報之餘，仲要焗畀管理費、認購費，最佳例子就係強積金。
其實想穩穩陣陣為資金增值，大可以學期權。呢種投資工具，唔識嘅人就會當佢係一般衍生工具，有如洪水猛獸，識得佢嘅人，就覺得佢夠「王道」。講真，真係好複雜，所以敏妮都好畀心機學緊，想搵money喎，梗係要付出。
溫敏妮
http://wanmanli.com/blogs/