兩年前，可口可樂併購匯源果汁（1886）呢單既轟動又曲折嘅刁，最終觸礁收場，匯源董事長朱新禮早前同內地傳媒講起傷心事時，仍然一殼眼淚，仲以「可能係創業17年最辛苦嘅兩年」嚟形容跌低再爬返起身嘅經過。
朱新禮接受內地《數位商業時代》訪問時，第一次就併購失敗大吐苦水，仲講明只有買賣先可以創造商品價值，「就好似一件作品，只有喺交易中先可以體現到佢嘅價值。」又話商務部否決當日，佢已經即刻開全國電話會議，之後幾乎日日一電，半年已經開咗90個會……咁都計住，睇嚟佢對兩年前嘅一役真係刻骨銘心。
到咗嘴邊嘅25億美金突然無得食，匯源仍然唔放棄拓展計劃，仲將谷谷埋埋嘅一肚氣用喺拓展上面。單計呢兩年，匯源已經開咗十幾間工廠，仲豪擲五、六十億人民幣打造「果汁果樂」，09年又請咗成萬個員工，集中火力充實一線銷售市場。嫁唔到可口可樂，匯源早前就同賽富基金「閃婚」，致力拓展有機農業，仲打算未來有自己嘅農產品銷售系統，喺全國各地搞有機產品專賣連鎖店。
跌低再企起身唔易，朱新禮仲識變中求生，繼續奮鬥，咁爭氣，唔怪得連內地傳媒都用「當代愚公」嚟形容佢啦！