埃及局勢動盪，令上禮拜五花旗股市顯著下跌166點，道指企喺保歷加通道中軸，暫可守穩。埃及問題點解會影響花旗股市？大家只要睇吓歷史同地理環境，會知道埃及問題唔單止係民主同獨裁嘅問題，更加唔係一個國家嘅問題，影響會好深遠，亦係奧巴馬力撐埃及總統穆巴拉克嘅原因。
港股上禮拜轉弱，今日好大機會下試位處23402嘅50日線，100日線喺23243，呢兩條線會有好強嘅支持力。
上石化C輪25189：上石化（338）上日報收4.84元，升4.5%。股價早前靠近5元關，橫行之後掉頭回落，下試20日線有支持，上日向上突破，技術走勢好靚，今日好大機會上試5元關，破位睇5.60元，可以諗吓隻C輪25189。
隻輪現價88仙，2011年3月30日到期，行使會3.98元，溢價只係0.4%，引伸波幅32.5%，槓桿率5.5倍（有效5.2倍），正股升上5.60元，25189睇1.62元，正股跌穿4.62元就沽咗隻輪。
俊樺