荷蘭中場雲邦美33歲人，火氣仍然好猛，上周六佢代表剛轉投嘅AC米蘭，作客卡坦尼亞打到54分鐘，已經兩黃一紅被逐，人生首場意甲就做「紅牌阿姑」，難怪行出場時教練艾基利都怒睥住佢（下圖）。好彩AC都算底子厚，之後靠羅賓奴同伊巴謙莫域各建一功，以2:0勝出，唔係雲邦美就做咗失分罪人。
拜仁慕尼黑送走咗雲邦美，不過球隊仍然未「河蟹」，事關陣中就有另一位荷蘭惡人洛賓。上周六拜仁作客贏雲達不來梅3:1，但賽後洛賓（上圖右）因不滿隊友湯馬士梅拿批評佢獨食，一拳打落梅拿仔塊面度，好彩隊友及時勸交。事後拜仁想淡化事件，聲稱唔會處分任何人住，同樣係荷蘭人嘅教練雲高爾，就話荷蘭人一向敢言，同德國文化唔同；打人都當冇事，擺明偏幫洛賓啦！