「殼王」陳國強為首嘅財團最近成功收購TVB（511），陳國強即刻成為紅人，各大傳媒爭住訪問呢位TVB新東家，可惜大部份都食檸檬。華華噚日就「有幸」喺銅鑼灣名人食肆「飯堂」撞到陳生，仲唔只，和黃（013）董事總經理霍建寧同前高官馬時亨都喺晒度，真係一次過滿足晒三個願望！
「殼王」同霍大班同樣係長和系主席李嘉誠嘅頭馬，老友鬼鬼都唔奇。佢兩個原本只係同另外一男一女食晏，餐飯食咗個幾兩個鐘，由於飯堂氣氛似會所，所以每枱人講嘢都非常斯文，其間只見佢哋言談甚歡，似老友敍舊；食到杯盤狼藉，霍大班竟然唔係叫夥計埋單，而係叫夥計加多個位，話馬生嚟緊。
馬時亨幫過誠哥打工
究竟邊位馬生呢？登登登凳，原來係馬時亨！肥馬匆匆嚟到，一坐低，5個人又傾一大餐，幾十分鐘之後先至齊齊起錨離開。華華本來想問吓「殼王」同霍大班係咪有喜事要慶祝，所以一齊食晏，但係佢哋毫不客氣咁請華華食檸檬！都啱嘅，「殼王」日前好認真咁搵人發聲明，話要等TVB單刁完成之後先會接受採訪吖嘛，點會忽然轉軚呢又？
「殼王」、霍大班同肥馬有咩共通點？一樣咁富貴，此其一；最重要係，三個人都同李嘉誠有關係，「殼王」、霍大班唔使講，肥馬就喺90年應霍大班嘅邀請，由加拿大返香港，加入和黃有份投資嘅熊谷組（即係家嘅香港建設），最高任職董事總經理，即係曾經間接替誠哥打工。
講番「殼王」，佢成功收購TVB，市場立即揣測佢係咪得到李嘉誠支持，喺咁敏感嘅時刻，佢同霍大班食晏，難免畀人無限遐想，不過咁，食餐飯啫，唔代表咩嘅，人梗係要食飯o架啦！
李華華
mailto:[email protected]