於新年期間遇到最掃興的事,就係眼見牛肉乾在車頭水撥間飛揚,真的睇到眼火爆!很多車主總受根深柢固的觀念影響,以為警察在新春期間亂泊車都放大家一馬,難免抱有博一博的心態!但係博都要博得精明,今日就醒幾個新春高危位畀大家,無理由明知係地雷都要踩嘛!
記者:趙慧敏
攝影:梁細權
免死金牌一樣抄
新春佳節,當然會一家大細出外拜年,今時今日仍然以為年初一至年初三可以有免死金牌,隨街任泊車?似乎太大想頭了!不過人人都揸車出街,有時公眾停車位真係唔多夠,冒吓險泊喺街邊,似乎又好難避免,不過農曆新年呢幾日假期出外,真係有某啲地方千祈咪博,因為中招機會可以話有九成九。
年三十晚 花墟晨早駐重兵
年三十晚食過團年飯,最重要嘅節目當然是行花市,買棵靚年花,不過人人都咁諗,人多之餘,車一樣多,警察叔叔自然部署喺重要位置,有時唔止趕車咁簡單,泊低部車隨時焗住抄,如果唔小心擺係路面阻塞交通,隨時車都俾人拖走。至於高危地方,除了維多利亞公園的年宵市場外,旺角花墟一帶都好危險,最近呢幾日已經日日夜夜駐重兵,趕車之餘,就算貪就腳違例泊喺附近,一樣照抄,各位司機小心為上。
年初一 5:00pm前撤離尖沙嘴
花車巡遊是大年初一的頭號活動,活動會喺晚上八時舉行,遊行路線喺梳士巴利道、文化中心、彌敦道及海防道一帶,不過為控制人流車流,警察會喺傍晚就開始封路,喺區內亂泊車,接牛肉乾似乎難以避免,不過就算泊喺附近停車場,隨時因為封路令你出唔到車,一樣咁狼狽,所以當日去附近嘅話,最穩陣下午五時前就要撤離。
廣東道附近有多個停車場,一旦封路會走唔到,記緊提早揸走架車。
年初二 海傍一帶隨時封路
大年初二煙花滙演,維港海岸自然逼到爆,部份錶位會停用,違泊就隨時換來拖車命運。高危位包括中環、灣仔及尖沙嘴一帶海傍,隨時會封路。至於西九龍海濱長廊是賞煙花的絕佳地點,不過長廊前的停車場在這段時間亦很可能會停用,如要泊車,還是選擇其他停車場。
年初三 黃大仙8:00am前泊好車
一般人都避免於赤口日拜年,這日拜神就最啱,車公廟黃大仙廟會實施交通管制措施,警察不時在附近巡邏,奉勸大家不要抱博一博的心態隨處亂泊。今年的好時辰是上午7-11時,人流高峯潮應在上午9時,預早泊入停車場最穩陣。