古永鏘是土生土長的香港人，但他05年在北京創立優酷，2010年將優酷送到紐約掛牌，彷彿與香港「割離」，被問及會否將優酷帶返香港或內地上市，他斷然拒絕，「公司成立時嘅架構已經是依據美國上市嘅模式，所以無論是香港或內地創業板嘅架構都唔啱，所以好自然揀去美國上市」。
優酷千里迢迢遠赴海外，古永鏘解釋，海外投資者對互聯網發展認識較多，而且對企業來說，在美國上市只是一個起步點，仍屬投資期，但在中國上市的意義卻有分別。
「若內地上市 似畢業禮」
他說：「我覺得企業喺中國上市係有一種好似畢業典禮咁嘅感覺……無論對媒體公司、網絡公司、政府部門或廣告客嚟講，上市就真係好似一個畢業典禮，上咗市就好似得到一個認可咁」。
優酷去年12月8日登陸紐交所，集資2.33億美元，首日掛牌急升161%，為美國五年來新股上市首日升幅最大的企業。對於股價首日表現，古永鏘稱：「路演時已經知反應好好，投行都同我哋講可以加價，但我諗到公司收入咁大，就算加價都只係多幾千萬美金，所以咪諗畀股東賺咪仲好，所以就定價12.8美金，配合12月8日上市，幾好意頭呀」。