味丹（2317）本年度業績，有望大翻身，加上PB特平，無妨。味丹主打味精生產，2010年半年度（6月底止）盈轉虧5218萬（港銀．下同），主要係集團仲要為環保問題，向越南農民補償9240萬銀。味丹半年度見紅，相信2010年度業績，亦無嘢好睇。但隨住集團廠房環保措施提升達標，賠償影響又挨到尾聲，加埋越南經濟亦一樣一支箭增長，味丹2011年度有望大翻身。
係咁易計數，味丹本年度純利上番09年度1.4億銀，預期PE得7.8倍。又味丹NAV每股1.32元，現價0.72元折讓高達45%，同類股無折讓，PB兼上到6、7倍。味丹喺越南經商多年，品牌建立有價，折讓無理由平到呢個地步。呢轉冷吼味丹，博上番1蚊雞，潛在回報率近40%，目標價PE都係得10.8倍，仲係好吸引。
和記行短打有肉食
和記行（720）挨近半年高位，買入等爆邊。和記行主打法拉利等名廠車中港分銷代理，中港好景，多咗班大豪客，集團單係2010年上半年度，已經大幅虧轉盈2960萬銀（09年半年度蝕5940萬銀）。相信下半年「大豪客」效應keep住，和記行全年度純利有望上到4000萬銀，預期PE得13倍，仲係抵買。呢轉短打，博和記行抽穿0.25元，見0.28元，回報率20%，有魚有肉。
錢雋