所謂壯觀戰鬥場面！筆者心目中佼佼者就有《戰狼300》，但勢估唔到，一套以貓頭鷹做主角嘅CG卡通，竟然有如此緊張震撼戰鬥氣氛，講緊係本周新返嘅《守護神傳奇》，一正一邪，鐵嘴鬥利爪，加埋DTS-HDMA5.1完美Surround聲效，一樣可以打到嘭嘭聲！
記者：陳國輝
毛髮質感超真實
每次睇CG，梗會留意角色嘅衣服以及毛髮質感，《守》片都唔例外！
呢套戲話明以貓頭鷹為主角，想知道CG製作有幾靚同認真？望吓佢身上嘅羽毛質感就一清二楚；老實講，戲內出現過幾類貓頭鷹，而且有老有嫩，例如故事中嘅BB女貓頭鷹，羽毛極之柔軟；相反，年紀老邁嘅驚天勇士，明顯身上嘅毛又硬又亂，感覺截然不同。
另一方面，CG人員對環境構造也睇得出特別認真，好似經常出現嘅日出時分，以及樹木與樹葉嘅細緻程度，喺1080p高清屏幕顯示之下，睇落勁似實景。
裝甲血拼夠震撼
如果你從未睇過呢套戲，齋憑封面溫情風格，或者你會誤以為佢係一套文戲。實情全程97分鐘，幾乎有一半都融入動作元素，例如訓練貓頭鷹飛行、戰鬥追逐場面等，劇情相當緊張。
唯一可惜係戲院上畫時提供咗3D眼鏡，但Blu-ray版只有2D而已！不過值得留意嘅係，戰鬥場面中採用咗好多不同類型武器，好似鐵面罩、鋼爪，甚至木琴也可當武器使用，加埋各類裝備撞擊時發出嘅聲響，感覺好震撼！
Profile
類型：卡通
畫面：2.4:1
音效：DTS-HDMA5.1（英）、DolbyDigital5.1（粵）
特別收錄：探索貓頭鷹守護神的世界及傳奇事迹、《ToTheSky》音樂錄影帶、珍貴圖片廊、拼圖遊戲
