蘇梅貨車尾開餐　腳皮奇觀

這是個擺明要你攤唞腦淨化的世界，即使是「最潮」的Chaweng，沿路，兩女走來一片死寂。印花裙、C貨三點式、波衫、手袋同篋，Sukmi：「啲頸鏈喺翟度翟起碼平一半喎！」算把啦！都係同街坊及旅客目標一致，湧到BigC、TescoLotus及家樂福買零食啦！

記者、攝影：陳慧敏

坐貨車　超市掃零食

三霸之中尤以TescoLotus最巴閉，小小島上已有三家，隨便坐架電單車，最多20分鐘就到。旅遊書介紹必買的鴨蛋或辣椒醬等都搵得齊。
Sukmi推住架車就直衝零食圈：「泰國超市零食最抵買，好多香港無又好好味o架！」比久違了的家樂福更大陣仗，12小包一打，包成枕頭咁大包批發裝她左擁右抱，我們好似賊咁一人揹住一大包，150蚊都唔使！「死啦！太大包塞唔到上車頭位呀！」「唔係呀嘛！呢o架貨車嚟o架咯喎！」係，見我們粗身大勢，一架扮的士的貨車已經好醒地駛到我們面前，但車頭乘客位居然塞唔落！惟有連人帶貨給搬到擺貨的車尾廂啦。有無咁誇張？就看她有甚麼零食推介，更新吓個賀年全盒都好！

■日本出品的香蒜味同牛油粟米味燒米餅，獨立包裝，香港未見。各約$9

■像香港買到的威化餅粒粒，但這包Lausanne是連埋一包朱古力shakeshake粉，好玩又好味！約$11/包

■BigBite魚乾紫菜！是我到泰國必買的零食，脆卜卜紫菜片上灑了花生粒，食到一地都係但好惹味。另有魷魚乾紫菜脆脆。約$4.5/包

a.TescoLotus
地址：1/7,moo6,Bophut

蒲友世界　夜市車仔檔

零食倒滿一車，我們在高速狂風中一路影，一路拆嘢食影相影到天昏地暗，直到嚇呆了的司機忽然出現在車尾：「咦？到喇？」原來由超市到Fridaynight最熱鬧、島民推介最掂的Fisherman'sVillage夜市只要15分鐘。嗱嗱臨執嘢搵返對拖鞋，下車啦！
來泰國的旅客，無論逛過多少個多少次泰國各地的夜市，到日落西山之時，對腳同個腦總係自自然然地飄去那燈火閃閃，人潮往來的夜市。蘇梅的夜市，像八十年代時香港的大笪地。Fisherman'sVillage的路以海邊的一個T字組成，紅起來，因為沿海一段都給外資湧進，整條路都開滿hip又chic，坐滿歐美遊客的閃閃令酒吧。平時，就係蒲吧友的世界，但周五晚由直路走進，水晶吊燈的洋化酒吧前，排滿一個個冒煙的「車仔檔」，一家大中小吵吵鬧鬧，打頭陣清一色BBQ串燒肉，芭蕉扇撥行炭火爐，咖喱與沙嗲等肉香飄至，隔一會有成籮噴水的蜆，60銖一個大筲箕即炒即食，仲有芭蕉燒糯米飯、pancake、連雞尾酒都有車仔檔，好熱鬧呀！我同Sukmi一個好烤肉一個愛甜品，咬住塊薄餅之時Sukmi又塞我食咖喱，同行泰國人同旅客也都一樣，因為同一般夜市不同係，統統都無桌椅，管你食蜆定食薄餅，一係買走一係捧住一路行一路食，一係，幫襯酒吧囉！

■想影美國人John手上塊即焗pizza，他OK一聲，就食咗，嘖！

■雞同豬肉串燒最香！約$5/兩串

魚毛Boots呀！

夜市除了食和買，還有魚仔spa！地踎小店落地玻璃一排的魚缸讓客人坐着浸腳，腳皮多的人還會成為旅遊景點，好多人合照o架！Sukmi就忍不住踎低「欣賞」一個遊客雙腳由魚仔群摟成一對今年大熱的魚毛boots！每位約$50

買買買!

■大近視眼鏡約$25

■手作拼布熊寶寶，手腳靈活隻隻不同款o架！各約$30起

■好大膽的人體彩繪啊！

■自家設計的串珠小手鏈，約$50，係貴咗啲囉……

食食食!

■漁港嘛，新鮮炒蜆最多。約$15/碟起

■口裏咬的是蕉葉烤糯米，手上大把串燒同零食……

■泰式pancake加了軟滑香蕉片或朱古力醬。約$5

■行行吓冲杯cocktail！約$15

姣婆色床舖酒吧Again

上回介紹過海邊舖滿白色大床，好玩唔好食的NikkiBeach，今回被街角彩色繽紛的小店吸引坐下，細望，每一圍對坐，都是給磨得光滑的古董木架床，有刻花的、矮腳的、擺滿豆袋的，然後小露台裏的小木架床，或老桌椅前羅帳輕掛，劃出一個個自我空間，配上艷紫撞嫩綠，溝埋姣婆藍同桃紅的牆壁與床帳，加上淡紅昏暗的燈光，氣氛綺麗得來有點奇詭。泰國真假古董市集都多，但那點點歷史刮痕，及現世代找不着的設計，總勾起你腦裏的幾個古董神話。循例都要影吓這裏最正特飲，幾個侍應姐姐笑笑推推，推介SexOnTheBeach。又係？有無啲新意呀？問極都話呢杯好。飲啖，唔辣嘅？不夠hot喎！倒是調得清清甜甜的，大熱天時係幾開胃，反而更易唔覺唔覺喝醉的那種……