儘管港府去年連番出招打壓樓價，惟無阻樓價升勢，身為房地產發展商嘅新世界發展主席鄭裕彤，噚日都話香港樓價過高，「希望賣平啲（樓）畀啲市民啦，最好o架啦」。早前有外國報告指本港樓價冠絕全球，彤叔亦點頭同意，並指有意將旗下樓盤價格降低一點，「賣平啲畀啲市民啦」。
彤叔咁為小市民着想，八方希望自己冇聽錯。樓價狂升，發展商賺到盆滿缽滿，彤叔亦願意與員工分享成果，「公司有加人工，（加幾多？）個別啦，平均幾個百分點啦，（有冇花紅呀？）有花紅，都係個別啦，一間間啦」。有何新年願望？佢笑言：「身體健康，仲有就業呀，各樣呀，個個都好啦！」