【本報訊】何家爭產風波成為全城熱話，身為何鴻燊摯友、持有澳娛9.6%股權的新世界發展主席鄭裕彤昨日出席萬邦投資股東會，自然吸引大班傳媒追訪。彤叔全程沒有回答關於萬邦的問題，反而就何家爭產事件說個不停，他認為賭王是一個公平的人，「個個都咁錫」，但因為是「人哋家事」，故以「清官難審家庭事」為由不便介入，同時「個個都唔幫」。
嘆清官難審家庭事
彤叔與賭王識於微時，年輕時一起打天下，除合資興建德黑蘭賽馬場，亦聯手入股澳門逸園賽狗公司。09年彤叔長孫結婚，雖然賭王身在醫院未能到賀，但何家仍派多位成員出席，可見兩人關係絕不只工作夥伴那麼簡單。
享盡齊人之福的賭王晚年亦難逃家族爭產糾紛，身為老友的彤叔看到也束手無策，「幫邊個吖你話，唉，點幫呀，幫呢個，人哋嬲你，咁你何必呢，所以冇、冇、冇……唔會介入呢啲嘢……因為人哋家事嚟o架嘛，點會搵我傾呢，啱唔啱……你知唔知清官難審家庭事呀」。但他認為賭王是一個公平的人，對四位太太都同等愛錫，「公平呀，佢都話個個都咁錫囉……嘻嘻，（個個都咁錫，咁會唔會個個都分咁多呀？）點知呀呢啲，呢啲唔知喎」。
彤叔又承認自己近日無見過賭王，「最近都冇（探佢），先排有一輪見過佢，前一輪，大約一個月，（佢當時嘅精神狀態點？）狀態好好呀」。被問及見到賭王捲入爭產漩渦的感受，彤叔不禁眉頭一皺，「好難講，真係唔知道，真係唔識得講」。他續稱，賭王從未向他透露如何分配財產。
爭拗無阻澳博運作
豪門爭產時有所聞，被追問是否已處理好財產分配，彤叔笑說：「我冇四個老婆咁多呀……哈哈哈哈，（你仔女子孫都多嘛，其實會唔會已經分好晒？）我亦冇佢咁多錢……哈哈……我又冇佢咁多老婆，係咪呀……哈哈。」
對於澳娛股權爭拗，彤叔認為澳博是一間上市公司，澳娛只是收取股息，澳娛股權變動不會影響澳博運作，「照理由就冇嘅，因為佢家都係另外一班人運作o架嘛，所以完全冇影響嘅，呢輪係股權問題，都唔關事，唔會影響公司嘅運作」。
澳娛於年初例會傳因為何家股權爭拗押後股東大會，彤叔表示未聞有會開。持有澳娛26.6%股權的霍英東家族代表霍震霆表示，澳娛大約在農曆年後便會召開股東會。