【本報訊】維園年宵「兔」氣揚眉，昨首天已吸引不少市民，入夜後更擠擁；提早「財神到」，檔販笑開眉，生意料升兩三成。精品多以兔為題，但曾掀炒賣潮的iPhone也大熱，有攤檔「二合一」推「i瘋兔」，其實是吹氣iPhone套，「手機跌落地都唔會爛」，也有iPhone遊戲AngryBirds的玩具精品，甚至有按日本冲繩傳說設計的許願氣球。
記者：翁煜雄
盧先生與數名教友合資逾10萬元，賣自家設計的「i瘋兔」，除包括iPhone保護貼、繪有兔仔等圖案的普通iPhone膠套，更有一個吹氣iPhone套，「可放部iPhone落去，部機跌落地都唔會爛」。他說已備iPhone3及4兩款，有信心大賣：「香港有成40萬個iPhone用戶喎。」
越無聊越受歡迎
「iPhone遊戲AngryBirds係受歡迎榜第一位o架！」港大學生Joey及Thomas以此遊戲為藍本，設計「真的憤怒了」遊戲，昨親自示範將印有雀鳥圖案的吹氣球，以橡皮圈彈向另一豬圖案吹氣球。遊戲有點「小兒科」，他們示範後也忍俊不禁，「但隻game真係咁玩，就係夠無聊先受歡迎」。他們說手機遊戲只「獨樂」，此遊戲卻可「眾樂」，適合新春聚會，而昨日的銷情亦不俗，賣了20多套：「原來好多大人都有玩隻game。」
近年年宵大熱精品，大多都不必問「要嚟做乜」，就如張祝珊英文中學學生設計的吹氣玩具「兔氣揚眉萬用筒」，「可以用嚟裝嘢，可以打佢紓壓」。中五學生陳穎添更示範另一用途，「仲可以戴喺頭度」。別以為他們柴娃娃，該校前年推售的「牛屎帽」便賣過滿堂紅，或因正中年輕人下懷，並預料今年生意多兩三成。他說今年來貨價貴50%，故「慳得一蚊得一蚊」，包裝也自己來。
海關未發現翻版
新春講意頭，Rex按日本冲繩傳說設計星語星願氣球，「當地人話將寫有願望嘅星星，放上天空就會靈驗」。他說顧客可獲日式護身符及星形氣球，「佢哋寫完願望，我哋可以代放上天空」，相信附近的民居最高興，因窗邊隨時多了一個氣球。
另外，食環署日前不准一電影公司播放3D三級影片，以免人潮阻塞通道，但有關攤檔負責人說未收到指示，將會繼續播放。該署昨也勸喻部份攤檔返回指定範圍。海關則派員巡查翻版產品，商標調查組指揮官陳自強說，已通知攤販不得售賣翻版產品，昨暫未有發現。
