"韋咸無力發難捧森林"
若賣得走中場靈魂查理阿當，黑池領隊荷路威可以分紅，有人話貪錢得過份，亦會令球會實力削弱搞到降班。但人工平霸領隊年幾前用50萬鎊買查理阿當返嚟，帶隊波由英冠下游升到英超中游，呢對慧眼勝過幾多亂使錢嘅英超班霸，值得老闆送番十零廿個佣獎賞；何況呢類細會也需要豐厚轉會費，錢生錢，否則不斷擴軍，有入冇出，盞步列斯聯同老樸後塵。黑池周中領先兩球最後輸番三粒畀曼聯，做佢哋擁躉也得鼓掌數吓；降唔降班，崇尚主攻嘅領隊肯定唔係最擔心嗰位，趁足總盃早出局，同老婆去度吓假重整人生同下半季球會部署。球隊壓力細，往往有意外驚喜，我對班波仲有信心！英足盃太接近下輪周中英超快車大戰，黑池周三會迎戰嘅韋斯咸，明日仲要喺第4圈迎戰英冠強豪森林；韋咸內憂內患，剛喺周中加時畀伯明翰踢出局，無緣入英聯盃決賽；兵源薄又戰線多，對低一級森林都讓唔起。
"不來梅搵拜仁發圍"
唔同黑池，德甲不來梅話晒季初仲打緊歐聯，家排尾5受降班威脅，擁躉真係接受唔到咯；不過高層唔係咁睇，對多年老臣、崇尚主攻嘅舒哈夫不離不棄，大讚佢只係攞唔到成績嘅好教練，將問題歸咎球隊整體，唔係好似其他球會咁，郁啲就炒；今天，不來梅迎跌watt班霸拜仁，將帥齊心，有士氣唔怕放心一博，[+1]同入球「大」，可捧！
"日本仲有本田發火"
呢排貼啲非英超波真係幾醒神，上周又中彼德堡同烏甸，連中4口，今次趁英足盃冇乜信心，多講幾場；二線波最矚目，當然係日本對澳洲嘅亞洲盃決戰，唔怕香川真司提早收爐，上次對南韓所見，另一外流猛將本田圭佑冒勇，今戰會主導中場，唔信成日畀澳洲食住，日兵士氣正盛，澳洲踢法較粗疏，上仗無故大勝烏軍，更添戒心。
"靴高斯12倍W發「塞」咯"
除咗黑池，我都好鍾意長賭靴高斯，除咗博冷W當然係入球「大」；好嘞，今次招呼季初贏過嘅無敵入球機器、巴塞隆拿，相信無人信前者可以兩循環起孖。小弟成日強調，小注博冷，同做蚊型班隊領隊一樣，護級邊緣有壓力，十多天前推介貝迪斯喺西盃冷贏巴塞，有運中到，當然波友不能要求天天中呢類大冷，但有時一鋪夠食幾日。靴高斯其實比黑池易捉，屬門口狗聯賽主場已4連勝兼全部開入球「大」，神經刀有12倍W，就同場場出美斯嘅巴塞鬥攻咯！
"艾迪巴約發到皇馬"
唔同巴塞，今輪我頗為睇好皇馬作客贏奧沙兩粒或以上，新簽嘅中鋒艾迪巴約真係成世好命，成日扭計扭到可以加盟鬧前鋒荒嘅皇馬，睇吓鐵血教練摩連奴點治佢，但班波穩打穩紮，周中贏西維爾有運，今次對低兩班嘅奧沙，3:1，4:1波膽可試。
語錄：英足盃今輪緊接下周中英超快車，小心強隊今輪排勁弱陣，睇唔通不宜重注。
文：蘋果波神