富豪級南貨舖老三陽銅鑼灣利園山道舖，因為頂唔順貴租，慘被迫遷做到今年4月中，有熟客向八方透露，聽聞老三陽已經搵到新舖搬遷，過年後就會安排搬到一街之隔嘅白沙道，新舊舖位只係隔半條街，新知舊雨去買嘢都好方便。
舊舖加租至50萬
據講老三陽現時舖位月租35萬元，由於自由行消費力強勁，珠寶鐘錶店捨得花錢租靚舖位，搞到銅鑼灣地舖租金瘋狂上升，月租動輒逾百萬元，老三陽舖位業主要求加租至50萬元，老闆祈廣楠話賣南貨唔係大生意，交唔起咁貴租，惟有無奈搬遷，據知原舖位日後會租予名牌鐘錶店，做內地闊佬生意。
老三陽喺銅鑼灣做生意超過40年，旁邊好多做街坊生意，賣水果、傢俬嘅小店大部份已經消失，進駐嘅都係名牌鐘錶珠寶店，老三陽熟客多，難怪生意長做長有，名人熟客據講包括前特首董建華、前政務司司長陳方安生、富豪趙世光、電視大亨六叔邵逸夫等，十分巴閉。