繼被傳有富豪包養之後，公民黨議員陳淑莊最近又有謠言纏身，坊間盛傳Tanya原來係爛蓉蓉豪宅THEICON其中一個小業主，因此咁落力與發展商周旋，質疑佢有利益衝突。
Tanya話呢個傳聞非常無厘頭，佢估計傳出呢啲流料，係因為THEICON其中一位投訴人與佢早就認識，加上單嘢涉及總金額以億元計，唔排除有人加鹽加醋，企圖抹黑佢，削弱小業主談判能力。Tanya同八方講，佢一直冇置業，家仍然係無殼蝸牛，外界如有懷疑歡迎調查起底。
自從發展商榮豐提出，以較原價高兩成金額回購THEICON單位後，Tanya即時減少曝光，佢話唔係怕謠言，而係由於小業主協商調解時會搵律師幫手，佢本身作為大律師，繼續介入有角色衝突，唔方便再畀太多意見。
立法會噚日除咗討論THEICON風波，本來會處理長實高層郭子威賣樓失言事件，但因會議超時，留待下月10號再追究郭子威。