工聯會噚日推出新書《勞苦工高：「就業優先的經濟發展策略」研究論集》，舉行新書發佈會，請嚟幾位重量級政壇人物，包括立法會主席曾鈺成、行會召集人梁振英同勞工及福利局局長張建宗到場。
張建宗致辭時賣口乖，指呢本新書除咗有好多數據、論據之外，仲係官員恩物，日後工聯會議員向佢窮追猛打質問勞工問題時，佢一定會即時溫書，睇吓有冇令工會滿意嘅「標準答案」。不過八方有啲奇怪，政府主旨唔係官商「合作」咩？曾鈺成透露，當年組黨搞民建聯時，曾向一啲搞政策研究嘅高人請教，點知俾人噴到一面屁，話政客只係識嗌口號，邊使研究政策！曾主席話，見到工聯會可以將政策研究出書，證明政客唔係只識吹水咁簡單，都可以認真搞研究。