爭燊家新聞睇得多，令人一身俗氣，八方頂唔順銅臭味，覺得需要平衡一下心理，噚日到中文大學睇吓當代知名美術評論家黃苗子捐贈畀中大嘅字畫文物，送虎迎兔之際，為心靈大掃除。
黃苗子珍藏捐贈中大
今次展覽名為《迴風舊夢》，由即日起至5月9日在中大中國文化研究所嘅文物館展廳舉行。過去十幾年，黃苗子已經捐咗700幾件書畫、墨拓、圖籍畀中大，當中300幾件係文物，十分珍貴。
今次展出嘅只係當中幾十件，包括清朝書法家陳澧嘅《行書條屏四幅》、書畫家蘇仁山嘅《人物四態圖卷》、明代顧炳摹仿歷代名畫家繪畫作品嘅《明萬曆三十一年刊本顧氏畫譜二冊》，當然唔少得黃苗子嘅墨寶，1997年親筆揮毫嘅《隸書四言聯》。
現年98歲嘅黃苗子家喺北京頤養天年，由二仔黃大威同埋三仔黃大剛出席捐贈儀式，兩人引述父親話最欣賞蘇仁山嘅作品，因為線條特別，好有個性，家中收藏好多蘇仁山字畫，黃老話獨樂樂不如眾樂樂，所以捐畀中大，令中大收藏蘇仁山嘅作品可以集中啲。
大英博物館收藏作品
黃苗子外甥女、基本法委員會副主任梁愛詩噚日都有出席捐贈儀式，佢同八方講，舅父鍾意蘇仁山為人正直、正義、敢言。蘇仁山部份作品顯示不滿封建王朝專制嘅憤慨，蘇仁山父親怕受株連，竟然以「不孝」之名將兒子送入監獄，蘇仁山後來喺獄中病逝。
黃苗子與香港淵源甚深，1913年出世，在香港中華中學讀書，好鍾意詩畫文藝，8歲學書法，又喺香港報章投稿漫畫，曾出任香港《國民日報》經理、國民黨中央海外部部長室總幹事、中央信託局秘書處處長等等，1950年定居北京。
咁嘅背景，喺中共治下有乜遭遇，唔使八方多講大家都知，直到八十年代改革開放後，黃苗子才有啲安樂日子過。佢嘅書畫作品曾經喺全球多國展出，大英博物館都有收藏。
mailto:[email protected]
