華叔對香港民主、社運嘅貢獻，香港市民有公論，因此特區政府一方面高度評價華叔，另一方面卻拒絕王丹、吾爾開希來港致祭，虛偽做法特別令人反感，估唔到領匯有樣學樣。
向高層上訴後開綠燈
民主黨員林立志同八方講，日前以李永達議員辦事處名義，想在領匯旗下長亨商場貼出悼念華叔活動海報，提醒街坊參加呢兩日嘅追思、致祭活動，點知遭領匯拒絕，理由係並非地區性活動，唔適合貼喺屋邨商場。
高官聲言審批民運人士來港致祭「情理兼備」，原來係落閘封關代名詞，領匯經理緊跟特區最高指示，對呼籲市民參加悼念活動都阻頭阻勢，真係十分離譜。林立志稱後來向領匯高層「上訴」，方獲開綠燈張貼海報。佢又話領匯狐假虎威有前科，早前想張貼議員辦事處開放時間資料都被留難。
領匯稱旗下商場告示板一般用作展示跟領匯業務、當區或整體社區事務有關嘅資訊，但亦會酌情考慮特殊情況，長亨商場審批民主黨海報程序符合安排。