縱然澳門酒店兩日一夜住宿索價拍得住泰國三日兩夜package，但市場需求大旺，無計，距離在一小時玩樂圈，兼過一過大海已有出國之感，難怪成為情侶們溫馨一下嘆一晚的熱選。
記者︰吳美美
攝影︰伍慶泉
Model︰Renee、Charles@Starzpeople
五星級五式浪漫
澳門酒店每到新年、聖誕等大時大節，總之一到假期就爆滿，插針難入。特別一眾大牌子酒店，早已準備一系列情人節套餐，盡量令一眾平時已經夠忙夠緊張的港男港女，唔使左度右度情人節去邊度慶祝！以下一系列情人節酒店套餐介紹，早成兩個星期放送畀情侶們參考，睇你仲有無藉口同另一半講情人節唔知去邊好！
最體貼！
四季：入住送千元禮券
相信只要你同女友講「我情人節已經book定房同你去四季慶祝！」基本上你已有八成贏面。無計，四季個名實在嚇得吓人，完全身份象徵，畀你女友同自己圍內班朋友晒吓命都夠晒。
首先，酒店搞了個「四季時尚行」，$2,388包住一晚豪華套房連雙人自助早餐，另送價值$1,000DavidYurman禮券，其實都算幾着數，因為品牌亦有幾千蚊款式可選擇，小記影相時就選中心形鏈墜配頸鏈價值$3,300，扣除一千蚊禮券，都係二千幾，連埋住宿埋單五千蚊有找，又住四季又有名牌首飾，滿足晒虛榮心啦！仲有，大家訂房時還可要求威尼斯人花店幫你按照所想預先裝飾房間（另外收費，拍攝當日用的花及蠟燭參考價約$2,480），咁就可以好似相中情侶嘅房間般充滿紫色浪漫啦！
當然，無理由全日留喺房咁悶，總要去spa嘆嘆兼食番個情人餐先叫正宗。情侶們可以齊齊享受浪漫水漾spa，足足做成2小時30分鐘，先來一個加有依蘭樹油、葡萄柚及天竺葵的雙人浸浴，再用咖啡粒子做磨砂，最好再來90分鐘滋潤按摩，仲可以嘆杯Moet香檳。
燭光晚餐冧女友必work！四季酒店的Windows餐廳，一向畀人好歐洲livingroom的感覺，喺呢度食一餐五個course的情人節晚餐，生理同心理都夠warm，仲有，2月10日前訂枱，大廚仲會送你朱古力球，情人節當日walk-in客無呢個surpriseo架！
浪漫水漾spa兩位$3,800
Windows情人節晚餐每位$688
a.四季酒店
地址︰氹仔望德聖母灣大馬路
網址： http://www.fourseasons.com/macau
最豪情人！
文華東方：瞓一晚包送7萬戒指
酒店名牌澳門文華東方酒店，就做了個情人節「浪漫承諾」總統套房體驗，聽聽索價幾多先……盛惠五條九，即$99,999，且是先到先得，只有一對情侶能在情人節當晚，享受五條九帶給你的一切！
這五條九究竟包咗乜東東？OK，先有直升機來回接送，任你香港或深圳都得，再喺總統套房（平時一晚都要$49,000）瞓足一晚包早餐，夜晚可以喺房內用99支玫瑰伴住食晚餐，當然要加插雙人水療環節，但重頭戲其實係……套餐內包括價值七萬蚊的DAMIANI"ThePromise"鑽石戒指一隻！唔止咁，更會贊助價值超過二百萬元之名貴珠寶一套供女士晚餐時佩戴，等女士成晚變身成公主，這位幸運女友當晚都好難唔冧到暈低。但天下間有咁多情侶，只做一款五條九套餐又點得呢？酒店另有$9,888起的「浪漫約會」住宿體驗，包住宿豪華景緻套房一晚、水療體驗、御苑情人節餐、香檳及朱古力等。
b.澳門文華東方酒店
地址︰新口岸新填海區B區B2街區B地段
網址： http://www.mandarinoriental.com/macau
索菲特：房內花池鴛鴦浴
澳門十六浦索菲特情人節亦推出「繾綣時光」客房套餐$4,999至$5,999，賣點係能足不出戶地慢慢嘆由行政總廚預備的三道菜法式晚餐，酒店亦預先喺按摩浴池內放滿玫瑰花瓣，等情侶食飽飽再慢慢浸個鴛鴦浴，床上亦放有玫瑰心形及朱古力，預先幫男士們準備好一束玫瑰花，登記入住時亦會送情侶合照一張，留為紀念。
c.澳門十六浦索菲特大酒店
地址︰澳門內港巴素打爾古街
網址： http://www.ponte16.com.mo/?id=1287
新濠鋒：滴蠟全身按摩
新濠鋒主打澄水療spa項目，推出「愛．旅」套票，個人旅程$1,388（情人節應該無人單拖？）及雙人旅程$2,388，90分鐘全身按摩，所用香薰油係以優質蜜蠟、椰子油、大豆油製成，利用蠟燭燃點時所溶解的香薰油做全身按摩，最後情侶們亦可將蠟燭帶走，隨時延續spa時的溫馨一刻，下次幫襯正價身體按摩護理時，帶同香薰按摩油蠟燭，仲有八折優惠。做完spa後，仲可免費使用游泳池同健身設施。
d.新濠鋒酒店
地址︰氹仔孫逸仙大馬路及廣東大馬路交界
網址： http://www.altiramacau.com
君悅：錫身烏龍茶磨砂
情人節客房無特別package，澳門君悅酒店亦喺spa方面落藥，分明睇中港人愛錫body的心理。怡．水療喺情人節推出的水療優惠，單人$1,388及雙人$2,588，包括少見用烏龍茶全身磨砂和怡．特色按摩，但建議大家比預約時間提早去，可盡情使用按摩池及40米恒溫泳池等，疏乎完一輪仲可拎走埋Kashwere浴袍。
e.澳門君悅酒店
地址︰路氹連貫公路新濠天地
網址： http://www.macau.grand.hyatt.com
澳門
明日大致天晴，7-12℃
TravelMemo
持香港居民身份證毋須簽證。
澳門駐港旅遊局：28388680
噴射飛航來往港澳碼頭至澳門，單程船票由$134起。網址： http://www.turbojetbooking.com
1港元約兌1.02澳門幣（文中價錢為澳門幣）
240V，三扁腳插座