唱歌超過50年，今年便80歲的潘迪華最享受演唱過程，她希望唱出的每一個音符都是悅耳動人的，所以迪華姐姐人生最後一個演唱會，她願意分毫不收。她又慨嘆新一代歌手身不由己，如早前她在電視看到陳奕迅（Eason）在港台頒獎禮獻唱，便覺得他的歌新不如舊，非常可惜。
對音樂的堅持和執着，正是潘迪華可以由60年代唱至Y世代的原因，她不交行貨，更加不想壞名聲，她從初入行開始就不是順毛貓，除了唱歌，就是唱歌，到今時今日，她不需為口奔馳，唱歌給觀眾享受，更可以給自己享受。
嘆新歌手乏自我
將於3月1至2日在文化中心舉行演唱會的潘迪華日前說：「今次應該係我最後一次開演唱會喇，都已經成80歲，再做都無能為力，所以今次開兩場，我所有嘢都要做得好，要求自然高。」
文化中心個唱會知音，製作費有限，迪華姐姐寧願將價就貨，她說：「我隊bigband，三個鼓，合唱團加和音，人數絕對唔可以少，音樂就係畀人留下深刻印象，舊嘅永遠係好嘅，bigband就係種懾人嘅感覺。我明白錢有限，所以我自己份人工可以唔要，你要給我最好嘅音樂，否則我係唔會做嘅。」
音樂新不如舊，人都是新不如舊，迪華姐姐不想輕視新一代，她只是慨嘆音樂人缺乏自我，她說：「我之前喺電視睇港台頒獎禮，見到Eason，我覺得佢唔得，感覺變咗，好似以前嘅Eason好啲，佢以前嘅歌好好聽，下次我有機會見到佢，我會同佢講。」
支持嘉欣結婚生仔
迪華姐姐認為新世代歌手太累了，她說：「我同祖兒都幾熟，佢好乖o架。我有次喺電視城化妝間見到佢，化緊妝嘅佢喺度瞓覺，真係陰功，累成咁，家做歌手就係咁，冇時間休息。不過如果我嗰時係咁聽話，我都會好紅，但人就係咁，因為我有要求，又唔聽話。」
契女林嘉欣遠走加國結婚生仔，迪華姐姐全力支持，她說：「家佢不知幾開心，但我怕佢兩個寵壞個女。」對於契女的事業，她一點也不緊張：「等啦！有好劇本嘅話，佢一定會再拍，呢個係佢興趣。」
採訪：楊潔雯
攝影：葉君海
