21世紀新世代，觀眾接受能力高，近年奸角當道，楊怡年前憑着勾心鬥角的《宮心計》中演奸妃成功上位，還可以乘勢到內地搵真銀，初嚐搵人仔的滋味，楊怡感謝公司鋪路，還表示會誓死效忠TVB答謝知遇之恩。
楊怡出道多年，最拿手是做乖乖女，做好人，十套有九套如是，乖女形象深入民心，下周無綫推出的新劇《魚躍在花見》靚人靚景，楊怡又做一個本質善良、但為了報仇卻出賣自己感情的人。
講到新劇《魚躍》賣點，楊怡笑說：「今次喺日本拍，個景真係好靚，仲有就係我同謝天華合作，印象好深，記得有次我爛嘴，點知又要同佢拍咀戲，佢返到香港就爛嘴，之後佢就話係我用個口過咗啲菌畀佢，真係好好笑！」
內地再演奸妃
當香港播映楊怡新劇的時候，楊怡已經在內地拍攝她的第一套內地古裝劇，她表示心情興奮之餘也帶點緊張，楊怡說：「我可以放心返大陸拍劇，自己仲有三套存貨，知道要返大陸拍劇，仲係做古裝奸妃，最初有少少擔心，因為香港同內地觀眾唔同，我驚佢哋接受唔到我咁奸！」
「誓死效忠TVB」
返內地拍劇收入高、福利好，更毋須要日捱夜捱，吸引好多姐仔向外闖，想走想飛，佘詩曼即將滿約，早前透露想過飛出去看看世界有多大，楊怡說：「我唔會去o架，我TVB大，誓死效忠TVB。」楊怡至今仍未登上視后寶座，當然要留在TVB向此目標進發。
採訪：楊潔雯 攝影：陳順禎
化妝：TY 服裝提供：NaQueen