都是笑話惹的禍？以「用人唯親」同「行政混亂」響朵嘅平等機會委員會，又鬧出疑似請親戚醜聞，一個唔夠料嘅員工，竟然係平機會委員嘅女！
有平機會員工忿忿不平咁報料畀八方，指去年4月請咗批助理平等機會主任，月薪23,000，其中一個獲聘書嘅女仔係freshgrad，唔符合職位要求兩年工作經驗嘅條件，平機會內部好多人唔明點解要請佢，直至早前聽到委員、浸大管理系教授趙其琨，喺講座上自爆與該女職員有「父女關係」，終於真相大白。
相應減入職薪金
用人唯親咁離譜？八方要求平機會解釋，發言人承認被投訴嘅女職員獲聘時冇兩年工作經驗，但與趙其琨絕無親戚關係，只係趙其琨任教浸大嘅學生。平機會又話去年聘請咗五個助理平機主任，除咗上述女職員，另一獲聘人士都係唔夠兩年工作經驗，兩人已相應減咗入職薪金。
發言人指工作經驗只係聘用條件之一，由於兩人學業成績好標青，所以破格聘用。八方向趙其琨查詢，佢話與女職員「認親認戚」純粹講笑。作為公職人員，講嘢都係謹慎啲好喎。