喺資訊爆炸嘅年代，連IT界嘅消息都特別靈通！話說聯想（992）董事長柳傳志，喺達沃斯世界經濟論壇接受《華爾街日報》訪問嗰時，話估計會有更加多嘅中國企業去美國投資；佢仲提到，喺上個禮拜，國家主席胡錦濤對美國進行國事訪問期間，美國總統奧巴馬同中投公司董事長樓繼偉，曾經就中國喺美國基建項目嘅投資進行探討。
中投係中國嘅主權財富基金，擁有成3000億美金資產，照華華睇，無論傾成乜嘢項目，個投資額都唔慌細。
講到聯想，柳總就話，家集團喺美國大約有2000員工。
佢話，聯想嘅母公司聯想控股，考慮緊收購一間美國醫療儀器公司，又打算喺酒店餐飲業進行收購，以滿足中國遊客嘅住宿需求。咁又係，家中國同胞越嚟越富貴，美國又係自由行勝地，應該食住條水快啲開！