一星期後就係農曆大年初一，正當大家興高采烈行年宵、辦年貨之際，仲有好多人喺新年大日子都唔可以齊齊整整一家人過新年。中國維權律師關注組多個成員，噚日到西環中聯辦示威，抗議中國政府打壓維權律師同法律學者，促請中國政府立即釋放高智晟、陳光誠、范亞峰、郭飛雄、鄭恩寵，畀佢哋返屋企過年，還佢哋真正自由，與家人團聚。
關注組代表指新年係中國人最重要節日，人人都想開心過年，然而大陸仍然對多位維權律師、法律學者同法律工作者騷擾恐嚇、非法拘留，有啲雖然已經刑滿出獄，但仍繼續軟禁、被強迫失蹤及遭身份不明人士毆打，家人同樣成為當局脅迫對象，惶惶不可終日，希望中國政府立即停止惡行。