上個禮拜，《港股王》搞咗個名家飯局，敏妮見到張菜單，不知幾羨慕有份出席嘅魏力同高明。可惜名額有限，敏妮冇份。不過，同魏力傾開，原來佢有唔少粉絲，當晚畀咗好多意見佢。雖然敏妮冇份出席，但都有啲意見畀《港股王》，希望可以加強內容，提供更多炒股靈感。
因念、UncleRay睇好富士康
話說，敏妮雖然冇份食名家飯局，但就出席咗《兩岸三地》專欄作者因念間公司嘅春茗，菜式豐富，仲有因念私人珍藏嘅紅酒。咁都唔止，最重要係聽到UncleRay同因念嘅揀股心得。UncleRay係專幫公司上市嘅顧問，因念就經常穿梭中港，同廣東省唔少廠家稔熟，佢哋一定聽埋唔少貼士。
聽因念講，雖然家陣內地廠家面對原材料價格上升、人工成本上升等影響，但對廠家嚟講，最緊要有客戶落定單。就好似富士康（2038），由於iPhone好賣，據聞已接到巨額嘅iPad2同iPhone5定單，所以因念同UncleRay都睇好富士康，仲叫敏妮留意。
言歸正傳，《港股王》係一個炒股網，為散戶提供唔同嘅炒股資訊，唔知可唔可以搵啲廠家訪問吓，睇吓佢哋年頭嘅定單情況，咁除咗令投資者了解個別公司前景，仲可以舉一反三睇埋整個板塊，為敏妮等散戶提供一啲投資方向。股壇前輩經常講，炒股有唔同門派，有人睇fundamental、有人就靠睇圖，兩者各有優點，但同樣並非完美，如果結合兩者，贏面相信大得多。
溫敏妮
http://wanmanli.com/blogs/