虎年對於賭王家族嚟講，都算係多事之秋，臨到農曆年年尾仲有壓軸爭產事件，日日上頭版。咁都唔只，賭王何鴻燊身邊「四大護法」之一禤永明（圖），上星期五丁父憂。禤永明老父禤海享壽九十有四，算係笑喪，聽日喺禤永明做董事嘅寶福紀念館大禮堂舉行安息禮拜，星期六出殯，遺體會送返廣東四會聚福寶華僑陵園安葬。
賭王「四大護法」，除咗禤永明，仲有蘇樹輝、陳偉能，同有「飛仔強」之稱嘅李志強。禤永明係澳門誠興銀行董事，07年嫁女，長居加拿大嘅賭王二太藍瓊纓專程返香港飲喜酒，可見佢嘅地位。最近何家爭產事件中有間關鍵公司Lanceford，唔講大家可能唔留意，禤永明都係董事之一。
唔知二太會唔會又親自率佢嗰房人去送禤老先生一程呢？