摩連奴講足幾個月，搞咗成個月，皇馬喺新一年終於有位「9號前鋒」加盟，就係從曼城外借前鋒艾迪巴約，不過呢位多哥球王一向寸咀，曼城唔算係傳統大會，今次轉到真正世界級嘅皇家馬德里，睇吓佢同陣中兩位大佬基坦斯奴朗拿度（C朗）同卡卡相處愉唔愉快嘞！
年薪僅次C朗卡卡
皇馬教練摩連奴同總監華丹奴鬧交鬧到反面咁滯，終於球會肯開綠燈等佢簽多一位前鋒，今次皇馬外借艾迪巴約單交易，都算幾划算，根據西班牙《馬卡報》報道，皇馬要向曼城付出約120萬歐元（約1,270萬港元）借用費，同畀晒艾迪巴約下半季年薪，大約425萬歐元。今年夏天，皇馬就有優先權，可以1,500萬歐元，買斷呢位26歲前鋒，不過比起09年艾迪巴約以大約2,900萬歐元從阿仙奴轉投曼城，曼城就算賣得出呢個貨尾，都要蝕錢。
多哥球王初嚟皇馬就認真威，因為以佢年薪計，喺隊中只比C朗同卡卡低，榮升皇馬「3哥」，甚至連左飛右撲嘅隊長卡斯拿斯都唔夠佢高人工。艾迪巴約周三就會接受體測，如無意外周四就會以皇馬球員身份見記者。其實摩連奴之前執教國際米蘭，已經傳過想簽艾迪巴約，不過唔夠曼城多錢，今次都算補中，摩連奴接受《阿斯報》訪問時講：「艾迪巴約嘅能力不用懷疑，不過我擔心佢比賽狀態不足，要操一輪先『弗』。」
摩連奴講紀律，我求大俠就希望艾迪巴約要收歛一下，事實呢條友個底好花，打阿仙奴時為咗轉會，就跳晒草裙舞；轉到曼城後，倒戈戰入阿仙奴波，就喪奔幾十碼向兵工廠球迷示威，結果被罰停賽。今次嚟到西班牙，希望新環境有新開始，唔好又扮大佬喇！
有入自然有出，西甲限註冊24名一隊成員，艾迪巴約嚟到自然有人要走，據報最大可能係中場馬哈馬度迪亞拉，事關佢只得半年約，「西甲曼城」馬拉加就想免費帶佢離開馬德里。